काठमाडौं । इरान भ्रमणमा रहेका उपप्रधान तथा परराष्ट्रमन्त्री नारायणकाजी श्रेष्ठले तेहरानमा ६ देशका विदेशमन्त्रीसँग छुट्टाछुट्टै भेटवार्ता गरेका छन् ।
तेहरानमा सम्पन्न एसिया कोअप्रेसन डायलग (एसीडी)को १९औँ विदेशमन्त्री स्तरीय बैठकको साइडलाइनमा उनले ६ देशका विदेशमन्त्रीसँग भेटवार्ता गरेका हुन् ।
परराष्ट्रमन्त्री श्रेष्ठले इरानका कार्यवाहक विदेशमन्त्री डा. अली बगेरी, म्यानमारका उपप्रधान तथा विदेशमन्त्री उ थान स्वे, बहराइनका विदेशमन्त्री डा. अब्दुललातिफ बिन रसिद अलजायानी, कुवेतका विदेशमन्त्री अब्दुल्ला अली अल–याह्या, साउदी अरेबियाका उप–विदेशमन्त्री वालिद बिन अब्दुल रिम अल खराइजी र रुसका उप विदेशमन्त्री एन्ड्रीइ रुडेन्कोसँग द्विपक्षीय भेटवार्ता गरेका हुन् ।
छुट्टाछुट्टै भएका भेटवार्तामा क्षेत्रीय तथा विश्वव्यापी मुद्दा र आपसी हितका विषयमा छलफल भएको परराष्ट्र मन्त्रालयले जनाएको छ । इरान भ्रमण सम्पन्न गरी परराष्ट्रमन्त्री श्रेष्ठ मंगलबार स्वदेश फर्कँदै छन् ।
Share this:
