काठमाडौं । शुक्रबार रातिदेखि परेको अविरल वर्षा देशभर भइरहेको छ । वर्षासँगै आकस्मिक बाढीको सम्भावना रहेको जल तथा मौसम विज्ञान विभागले जनाएको छ ।
विभागका अनुसार आज दाङ, बाँके, बर्दिया, कैलाली, कन्चनपुर, डडेलधुरा, डोटी र आसपासका जिल्ला भई बहने अधिकांश स–साना नदीहरूमा बहाव बढ्ने छ ।
साथै, केही स–साना नदीमा आकस्मिक बाढीको उच्च जोखिम रहने पूर्वानुमान गरिएको छ । ती क्षेत्र आसपास बस्नेहरूलाई सावधानी अपनाउन विभागले अनुरोध गरेको छ ।
विभागका अनुसार देशभर साधारणतयादेखि पूर्णतया बदली रहनेछ । सबै प्रदेशका धेरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ ।
कोसी, वाग्मती, गण्डकी, लुम्बिनी, कर्णाली र सुदूरपश्चिम प्रदेशका थोरै स्थानमा तथा मधेस प्रदेशका एक–दुई स्थानमा भारी देखि धेरै भारी वर्षाको सम्भावना छ । साथै गण्डकी, लुम्बिनी, कर्णाली र सुदूरपश्चिम प्रदेशका एक–दुई स्थानमा अति भारी वर्षाको पनि सम्भावना रहेको विभागले जनाएको छ ।
