काठमाडौँ । प्रमुख प्रतिपक्षी दल माओवादी केन्द्रले ऊर्जा, जलस्रोत तथा सिंचाइमन्त्री दीपक खड्काले नेपाल विद्युत् प्राधिकरणको काममा अवरोध गरिरहेको भन्दै आपत्ति जनाएको छ ।
विद्युत् प्राधिकरणको कार्यालयमा मन्त्री खड्काले कार्यकक्ष खोलेर प्राधिकरणको काममा अवरोध पुर्याएको माओवादीको भनाइ छ ।
पार्टी अध्यक्ष पुष्पकमल दाहालको निजी निवास ललितपुरको खुमलटारमा बसेको केन्द्रीय कार्यालयको बैठकले ऊर्जामन्त्रीले नेपाल विद्युत् प्राधिकरणको केन्द्रीय कार्यालयमा कार्यकक्ष स्थापना गरेकोप्रति आपत्ति जनाएको हो ।
माओवादी केन्द्रका प्रवक्ता अग्निप्रसाद सापकोटाले भने, ुविद्युत् प्राधिकरणले लाइन काट्ने कुरा गरिरहेको छ । त्यसमा मन्त्रीले नै अनौठो, इतिहासमै कहिले नभएको कुरा विद्युत् प्राधिकरणमा नै कार्यकक्ष खोलेर, बसेर विद्युत् प्राधिकरणले गरेको काममा अवरोध सिर्जना गर्ने काम गरेको छ । सरकारले बिचौलियालाई जोगाउने, भ्रष्टाचारीलाई जोगाउने काम गरिरहेको छ ।’
ऊर्जा, जलस्रो तथा सिंचाइमन्त्री खड्काले बुधबार प्राधिकरणको कार्यालयमा कार्यकक्ष बनाएका छन् । मन्त्री खड्काको उक्त कार्यलाई लिएर माओवादीले आपत्ति जनाएको हो ।
