काठमाडौँ — नेपाल नागरिक उड्डयन प्राधिकरण (क्यान) ले नेपाल वायुसेवा निगमका वरिष्ठ पाइलट क्याप्टेन विजय लामामाथि कारबाही गर्दै उडानमा अनिश्चितकालका लागि प्रतिबन्ध लगाएको छ। उडान सञ्चालनसम्बन्धी मापदण्ड उल्लङ्घन गरेको ठहरसहित प्राधिकरणले यस्तो कदम चालेको हो।
क्यानका अनुसार लामाले उडानको क्रममा फोटो तथा भिडियो खिचेर भ्लग तयार पारेको पाइएको छ, जसले उडान सुरक्षा मापदण्ड र नियमनको स्पष्ट उल्लङ्घन गरेको मानिएको छ। उडानको वातावरणमा ध्यान केन्द्रित गर्नुपर्ने अवस्थामा भ्लग बनाउने गतिविधि सुरक्षा जोखिममा पर्ने कारण क्यानले कडा निर्णय लिएको बताइएको छ।
प्राधिकरणले नेपाल वायुसेवा निगमको अपरेसन विभागलाई पत्र पठाउँदै अर्को सूचना नआउँदासम्म रोस्टरबाट हटाई जहाज उडाउन नदिन निर्देशन दिएको छ। यस विषयमा निगम र प्राधिकरणबीच थप समन्वय भइरहेकाे जनाइएको छ।
वीरगन्ज — वीरगन्ज भन्सार क्षेत्रबाट स्रोत नखुलेको १० लाख नेपाली रुपैयाँसहित एक भारतीय नागरिक पक्राउ परेका छन्। पक्राउ परेका व्यक्ति भारत बिहार राज्य, मोतिहारी जिल्ला रक्सौलका ५३ वर्षीय सुरेन्द्र साह रहेका छन्।
सीमापारी रक्सौलबाट वीरगन्जतर्फ आउँदै गरेको साहले चलाएको मधेस प्रदेश–०३–०२५ प ९८०७ नम्बरको मोटरसाइकललाई वीरगन्ज महानगरपालिका–१६, रजत जयन्ति चोकमा प्रहरीले रोक्दै चेकजाँच गरेको थियो।
प्रहरी चेकजाँचको क्रममा मोटरसाइकलको एयर फिल्टरभित्र लुकाइ राखिएको १ हजार दरका ७ सय नोट र ५ सय दरका ६ सय नोट गरी कुल १० लाख रुपैयाँ बरामद गरिएको पर्साका प्रहरी नायब उपरीक्षक हरिबहादुर बस्नेतले जानकारी दिए।
प्रहरीले पक्राउ परेका साहलाई हुण्डी कारोबारमा संलग्न रहेको आशंकामा थप अनुसन्धान अघि बढाएको छ।
