काठमाडौँ । नेकपा एमालेको कार्यकर्ता घुस रकम सहित रंगेहात पक्राउ परेको छ । राष्ट्रिय किताब खाना (शिक्षक), छाउनी मार्ग तहाचल, काठमाडौँमा कार्यरत शाखा अधिकृत धनेश्वर प्रसाईं तीन लाख रुपैयाँ घुससहित पक्राउ परेको हो ।

अख्तियार दुरुपयोग अनुसन्धान आयोगको टिमले पेन्सनपट्टा बनाइदिने प्रयोजनका लागि सेवाग्राहीसँग घुस माग गरिरहेको सूचनाका आधारमा सेवाग्राहीबाट रु तीन लाख घुस लिइसकेको अवस्थामा उक्त रकमसहित निजको कार्यकक्षबाट आज नियन्त्रणमा लिई थप अनुसन्धान भइरहेको प्रवक्ता नरहरि घिमिरेले जानकारी दिए ।

पक्राउ परेका प्रसाईं रामेछाप जिल्ला मन्थली नगरपालिका ७ भटौली निवासी हुन् । उनी एमाले निकट हुन् । उनले प्रधानमन्त्री समेत रहेका एमाले अध्यक्ष केपी शर्मा ओली र युवा नेता महेश बस्नेत सँग फोटो खिचेर फेसबुकमा शेयर गरेका थिए ।