टिकटकमाथिको प्रतिबन्ध खुलाउँदै सरकार

काठमाडौं । सरकारले लोकप्रिय सामाजिक सञ्जाल ‘टिकटक’माथिको प्रतिबन्धन खुला गर्ने भएको छ । प्रतिबन्ध गर्ने निर्णय गरेको करिब १० महिनापछि सरकार पुनः खुला गर्ने तयारीमा पुगेको हो ।

सामाजिक सद्भाव बिगार्ने काम गरेको भन्दै तत्कालिन पुष्पकमल दाहाल ‘प्रचण्ड’ नेतृत्वको सरकारले २०८० कार्तिक २७ गतेदेखि टिकटकमाथि प्रतिबन्ध गरेको थियो ।

तर, नेपालको सबै ऐन/नियम पालना गर्ने प्रतिवद्धतासहित टिकटकले दोहोर्याएर पत्राचार गरेसँगै सरकार खुला गर्ने तयारीमा पुगेको हो । सञ्चार मन्त्रालय स्रोतले जनाएअनुसार केही दिनअघि टिकटकको एसियाका पोलिसी डिभिजन चिफ फेरसले खुला गरिदिन आग्रह गर्दै पठाएका थिए । उनले पत्रमा नेपालभित्र लागु हुने सबै ऐन/कानुनहरु पालना गर्न तयार रहेको जनाएका छन् ।

टिकटकले यसअघि पनि सरकारलाई पत्र लेख्दै नेपालका कानुनहरु पालना गर्न प्रतिबद्धता जनाएको थियो । यद्यपि, पछिल्लो पत्राचारसँगै सरकार सकारात्मक बनेको हो ।

स्रोतका अनुसार सञ्चारमन्त्री पृथ्वीसुब्बा गुरुङले प्रतिबन्ध फुकुवाका लागि टिप्पणी उठाउन कर्मचारीलाई निर्देशन दिइसकेका छन् । बताइएअनुसार आगामी बिहीबार बस्ने मन्त्रिपरिषद्को बैठकबाट टिकटक खुला गर्ने निर्णय हुनेछ ।

टिकटक प्रतिबन्धको निर्णय लगत्तै नेपालका लागि चिनियाँ राजदूत छन् सोङले तत्कालीन प्रधानमन्त्री प्रचण्डलाई भेटेरै असन्तुष्टि व्यक्त गरेका थिए ।