काठमाडौँ । सर्लाहीको धन्कौल गाउँपालिका–३ स्थित अन्नपूर्ण चिनी उद्योगमा काम गर्ने क्रममा मेसिनमा च्यापिएर एक युवा मजदुरको बीभत्स मृत्यु भएको छ। उखुको खुवा बनाउने मेसिनमा च्यापिँदा धन्कौल–४, महिनाथपुर बस्ने १९ वर्षीय चुनचुन रायको घटनास्थलमै ज्यान गएको हो।
जिल्ला प्रहरी कार्यालय सर्लाहीका प्रवक्ता एवं प्रहरी नायब उपरीक्षक सरोज राईका अनुसार उद्योगमा मजदुरी गर्दै आएका राय बुधबार मेसिनमा काम गरिरहेका बेला अचानक दुर्घटनामा परेका थिए।
मृतकको शव परीक्षणका लागि प्रादेशिक अस्पताल मलङ्गवा पठाइएको छ। उद्योगभित्र भएको यस दुःखद घटनाबारे थप अनुसन्धान भइरहेको र सुरक्षा मापदण्ड पालना भए-नभएको बारे पनि सोधपुछ भइरहेको प्रहरीले जनाएको छ।
