काठमाडौँ । बैंक लुटपाटको रकम खोज्ने क्रममा सवारी चेकिङ कडा पारिएको बेला प्रहरीले सिन्धुलीबाट ठूलो परिमाणमा स्रोत नखुलेको अमेरिकी डलरसहित एक जनालाई पक्राउ गरेको छ।
सिन्धुलीको गोलन्जोर गाउँपालिका–७ स्थित चेकपोष्टबाट झापाको मेची नगरपालिका–३ का ३४ वर्षीय युवराज नेवारलाई प्रहरीले नियन्त्रणमा लिएको हो। उनी काठमाडौँबाट इलामतर्फ जाँदै गरेको बा १६ च ८०४८ नम्बरको टाटा सुमोमा सवार थिए।
उनको साथबाट ५७ हजार अमेरिकी डलर र १२ हजार नेपाली रुपैयाँ बरामद गरिएको जिल्ला प्रहरी कार्यालय सिन्धुलीले जनाएको छ। नेवारमाथि इलाका प्रहरी कार्यालय खुर्कोटमा राखी थप अनुसन्धान भइरहेको छ।
