तेहरान । इरानमा बढ्दो महँगी र आर्थिक संकटको विरोधमा करिब दुई हप्तादेखि जारी प्रदर्शन हिंसात्मक बन्दै गएको छ। राजधानी तेहरानबाट सुरु भएको आन्दोलन अहिले ५० भन्दा बढी सहरमा फैलिएको छ।
बिहीबार राति प्रदर्शनकारीले सवारीसाधन र सरकारी कार्यालयमा आगजनी गरेका छन् भने इस्फहानस्थित सरकारी प्रसारण संस्थाको भवनमा पनि आगो लगाइएको छ। ह्युमन राइट्स एक्टिभिस्ट्स न्युज एजेन्सीका अनुसार हालसम्म ३४ प्रदर्शनकारी र ७ सुरक्षाकर्मीको मृत्यु भएको छ भने २ हजारभन्दा बढी पक्राउ परेका छन्।
