काठमाडौँ — नेपाल प्रहरीले लागूऔषध खैरो हिरोइन र नगदसहित एक युवा पक्राउ गरेको छ। प्रहरी वृत्त कालीमाटीको टोलीले काठमाडौँ महानगरपालिका–१३ बाफल क्षेत्रमा लागूऔषध बिक्री तथा ओसारपसार भइरहेको गोप्य सूचनाका आधारमा सिन्धुली घर भई नागार्जुन बस्ने युवराज लाखेलाई पक्राउ गरी सार्वजनिक गरेको हो।
जिल्ला प्रहरी परिसर काठमाडौँका प्रवक्ता तथा प्रहरी उपरीक्षक पवनकुमार भट्टराईका अनुसार लाखेको साथबाट ५.८२ ग्राम खैरो हिरोइन र नगद ५४ हजार ६०० रुपैयाँ बरामद गरिएको छ। साथै एक थान मोबाइल फोन पनि प्रहरीले नियन्त्रणमा लिएको छ।
पक्राउ परेका लाखेलाई लागूऔषधसम्बन्धी कसुरमा जिल्ला अदालत काठमाडौँबाट म्याद थप गरी आवश्यक अनुसन्धान अघि बढाइएको प्रवक्ता भट्टराईले जानकारी दिए।
