वीरगन्ज — वीरगन्ज भन्सार क्षेत्रबाट स्रोत नखुलेको १० लाख नेपाली रुपैयाँसहित एक भारतीय नागरिक पक्राउ परेका छन्। पक्राउ परेका व्यक्ति भारत बिहार राज्य, मोतिहारी जिल्ला रक्सौलका ५३ वर्षीय सुरेन्द्र साह रहेका छन्।
सीमापारी रक्सौलबाट वीरगन्जतर्फ आउँदै गरेको साहले चलाएको मधेस प्रदेश–०३–०२५ प ९८०७ नम्बरको मोटरसाइकललाई वीरगन्ज महानगरपालिका–१६, रजत जयन्ति चोकमा प्रहरीले रोक्दै चेकजाँच गरेको थियो।
प्रहरी चेकजाँचको क्रममा मोटरसाइकलको एयर फिल्टरभित्र लुकाइ राखिएको १ हजार दरका ७ सय नोट र ५ सय दरका ६ सय नोट गरी कुल १० लाख रुपैयाँ बरामद गरिएको पर्साका प्रहरी नायब उपरीक्षक हरिबहादुर बस्नेतले जानकारी दिए।
प्रहरीले पक्राउ परेका साहलाई हुण्डी कारोबारमा संलग्न रहेको आशंकामा थप अनुसन्धान अघि बढाएको छ।
