काठमाडौँ । सरकारले पूर्वसभामुख दमननाथ ढुंगानाको राष्ट्रिय सम्मानका साथ अन्त्येष्टि गर्ने निर्णय गरेको छ । आज बिहान प्रधानमन्त्री निवास बालुवाटारमा बसेको बैठकले यस्तो निर्णय गरेको हो ।
मन्त्रिपरिषद्ले ढुंगानाको निधनमा गहिरो शोक र भावपूर्ण श्रद्धाञ्जली तथा परिवारमा समवेदना व्यक्त गर्दै आज राष्ट्रिय सम्मानका साथ उनको अन्त्येष्टि गर्ने निर्णय गरेको सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले जानकारी दिए ।
गुरुङका अनुसार ढुंगानाको निधनको शोकमा आज सार्वजनिक बिदा दिने एवं स्वदेश र विदेशस्थित सबै सरकारी कार्यालयमा आधा झण्डा झुकाउने निर्णय पनि भएको छ ।
ढुंगानाको आइतबार निधन भएको थियो । उनको आजै अन्तिम संस्कार गर्ने तयारी रहेको बताइएको छ ।
