पोखरा । पूर्वप्रधानमन्त्री डा. बाबुराम भट्टराई नेतृत्वको नेपाल समाजवादी पार्टीको विधान अधिवेशन आजदेखि पोखरामा सुरु हुँदैछ । २०७९ सालको असारमा जनता समाजवादी पार्टीबाट अलग भएर गठन भएको नेसपाले पहिलोपटक विधान अधिवेशन गर्न लागेको हो ।
पोखरा सभागृहमा दिउँसो १२ बजेपछि सुरु हुने अधिवेशनको औपचारिक उद्घाटन हुनेछ । उद्घाटनपश्चात बन्द शत्र सुरु हुने नेसपा नेता किरण थापा (आमोद) ले बताए । उनका अनुसार बन्द शत्रमा विधान मस्यौदा र राजनीतिक प्रतिवेदन प्रस्तुत हुनेछ ।
प्रतिवेदनमाथि समूह विभाजन गरेर छलफल हुने थापाको भनाइ छ । समूहबाट आएको छलफललाई समेटेर विधान मस्यौदा र राजनीतिक प्रतिवेदन पारित गर्दै मंगलबार सकिनेछ । विधान अधिवेशनले नयाँ वैकल्पिक शक्ति र समाजवादको अपरिहार्यताबारे छलफल गर्नेछ ।
देशभरबाट ५ सय बढी प्रतिनिधि सहभागी हुनेछन् । नेसपाले माघमा अधिवेशन गर्ने तयारीमा जुटेको छ ।
