काठमाडौं । बागमती प्रदेशका मुख्यमन्त्री बहादुरसिं लामाले प्रदेशसभामा विश्वासको मत पाएका छन् । मंगलबार बसेको बागमती प्रदेशसभा बैठकमा उनले राखेको विश्वासको मतको प्रस्ताव बहुमतले पारित भएको हो ।
मतसम्बन्धी प्रस्तावमा भएको मत विभाजनका क्रममा मुख्यमन्त्री लामालाई ६४ मत प्राप्त भएको थियो । उनको विपक्षीमा ३५ मत खसेको थियो । यस्तै तीन सांसद तटस्थ बसेका थिए ।
बागमती प्रदेशसभाका सभामुख भुवन पाठकले मुख्यमन्त्री लामाको पक्षमा आएको मत प्रदेशसभाको बहुमत भएको भन्दै घोषणा गरेका थिए । उनी गत साउन ८ गते एमाले र कांग्रेसको गठबन्धनबाट प्रदेशको मुख्यमन्त्रीमा नियुक्त भएका हुन् ।
