काठमाडौं । स्वास्थ्य तथा जनसंख्यामन्त्री प्रदीप पौडेलले गुणस्तरीय स्वास्थ्य क्षेत्रको विकासका निम्ति आफू सबैको सहकार्यमा अघि बढ्ने बताएका छन् । वीर अस्पतालको १३५औँ वार्षिकोत्सवका अवसरमा शनिबार काठमाडौंमा आयोजित कार्यक्रममा उनले स्वास्थ्य क्षेत्रको विकासका लागि वर्तमान सरकार गम्भीर रहेको उल्लेख गरे ।
उनले स्वास्थ्य संस्थाको विकासका निम्ति आफूले निर्देशन दिने नभई सहकार्य गर्न खोजेको बताए । स्वास्थ्य क्षेत्रमा आवश्यकताअनुसार दरबन्दी सिर्जना गर्ने र राज्यको स्रोतले भ्याएसम्म सेवा सुविधा विस्तार गर्ने उनको भनाइ थियो ।
उनले मन्त्री, कर्मचारी वा विभिन्न पदमा पुगेकाले देश र जनतालाई केन्द्रमा राखेर काम गर्नुपर्ने बताए । न्याम्स र वीर अस्पतालमा कुनै विवाद हुन नहुने भन्दै उनले दुवैलाई सहज रूपमा अघि बढाउने गरी मन्त्रालयले सहजीकरण गर्ने उल्लेख गरे ।
