हेटौंडा । केन्द्रीय सत्ता समीकरणमा फेरबदल आएसँगै नेकपा एमालेले बागमती प्रदेश सरकारलाई दिएको समर्थन फिर्ता लिने भएको छ ।
आज एमालेले समर्थन फिर्ता लिन लागेको संसदीय दलका नेता तथा आर्थिक मामिला तथा योजनामन्त्री जगन्नाथ थपलियाले जानकारी दिए । मुख्यमन्त्री तथा मन्त्रिपरिषद् कार्यालयमा समर्थन फिर्तासहित मन्त्रीहरूको सामूहिक राजीनामा बुझाउने तयारी रहेको उनले बताए ।
अहिले नेकपा माओवादी केन्द्रको नेता शालिकराम जम्कट्टेल मुख्यमन्त्री छन् । उनी १८ महिनादेखि नै सरकारको नेतृत्व गरिरहेका छन् ।
बागमतीमा एमालेबाट नेता थपलियासहित रामेश्वर श्रेष्ठ, केशव पोख्रेल, एकालाल श्रेष्ठ र प्रकाश श्रेष्ठ मन्त्रीमा रहेका छन् ।
२०८० चैत पहिलो साता दोस्रो पटक एमाले सरकारमा गएको थियो ।
