काठमाडौं । सहकारी ठगी प्रकरण छानबिनका लागि बन्ने संसदीय समितिको कार्यादेश (टिओआर)लाई अन्तिम रूप दिन कार्यदल बैठक बसिरहेको छ। सिंहदरबारस्थित कानुन, न्याय तथा संसदीय मामिला मन्त्रालयमा कार्यदल सदस्यहरू छलफलमा जुटेका हुन्।
कार्यदल बैठकले सोमबार साँझ प्रधानमन्त्रीको सरकारी निवास बलुवाटारमा सत्ता र प्रतिपक्षी दलहरूबीच भएको सहमतिलाई अन्तिम रूप दिनेछ। यसअघि छानबिन समिति बनाउँदा टिओआरमा गृहमन्त्री रवि लामिछानेको नाम राख्नुपर्ने अडानबाट कांग्रेस पछि हटेपछि दलहरू सहमतिमा पुगेका हुन्।
कांग्रेसले सोमबार साँझ भएको सहमतिलाई पार्टीको संसदीय दलको बैठकबाट अनुमोदनसमेत गरिसकेको छ। कार्यदलले अन्तिम रूप दिएपछि कार्यादेश शीर्ष नेताहरूले टुंग्याउनेछन्।
सरकार र कांग्रेसबीच ७ सदस्यीय संसदीय छानबिन समिति बनाउने सहमति भएको छ। कांग्रेसले आफ्नो पार्टीबाट ३ बजेभित्रमा समितिमा रहने सदस्यको नाम दिइसक्ने प्रमुख सचेतक रमेश लेखकले बताए।
कार्यदलमा एमाले र कांग्रेसबाट दुई-दुई जना, माओवादी, रास्वपा र राप्रपाबाट एक-एक जना रहने छन्। समितिलाई प्रतिवेदन बुझाउन ३ महिनाको समय दिइएको छ। आज साँझ बस्ने प्रतिनिधिसभा बैठकबाट समितिले वैधानिकता प्राप्त गर्नेछ।
