पोखरा । गण्डकी प्रदेशका मुख्यमन्त्री खगराज अधिकारीले आज विश्वासको मत लिँदैछन् ।
शनिबार बसेको नेकपा एमाले र माओवादीको बैठकले उनलाई विश्वासको मत दिन ह्वीप जारी गरेका छन् ।
एमाले संसदीय दलका प्रमुख सचेतक गोविन्द नेपालीले मुख्यमन्त्री अधिकारीलाई विश्वासको मत दिलाउने निर्णय गरिएको बताए ।
राप्रपाले भने अहिलेको गठबन्धनलाई साथ नदिने तर विपक्षमा बस्ने कि तटस्थ बस्ने भन्नेबारे अझै निर्णय गरिसकेको छैन । एमालेका २२, माओवादीका सभामुखसहित ८ र राजीव गुरुङ (दीपक मनाङे)को समर्थनमा गत चैत २५ गते एमाले नेता अधिकारी मुख्यमन्त्री नियुक्त भएका थिए । सभामुखलाई पनि गणना गरेर नियुक्ति हुनु असंवैधानिक भन्दै निवर्तमान मुख्यमन्त्री सुरेन्द्रराज पाण्डेले दायर गरेको रिट सुनुवाइ गर्दै सर्वोच्च अदालतले अधिकारीलाई विश्वासको मत लिन पाउने फैसला सुनाएको थियो ।
६० सदस्यीय प्रदेशसभामा बहुमतका लागि ३१ सांसदको समर्थन आवश्यक पर्छ । तर सत्तारुढ दलहरुले भने सभामुख तटस्थ हुने भएकाले उनको गणना नगरी ५९ प्रदेशसभा सदस्यमध्येबाट बहुमत पुर्याए हुने दाबी गरिरहेका छन् । यस अनुसार ३० जनाको समर्थन भएमा मुख्यमन्त्रीले विश्वासको मत पाएको मानिने उनीहरुको भनाइ छ ।
